2018-01-12

Txalotu

Nor-nori-nork, baldintza eta subjuntibo, joder. Hitz bakoitza dagokion lekuan kokatu, esaldia nola edo hala osatu eta badoa, bota du! Auskalo zenbat buelta ematen dituen euskara ikasten ari denaren garunean esaldiaren amaieran ipini behar duen aditzak: zi-tza-iz-ki-dan edo zi-tza-iz-ki-zun?

Zailtasunak zituzten horiei eta praktikatu nahi zutenei laguntzeko eman nuen izena Andoaingo Mintzalaguna egitasmoan. Bide batez, jende berria ezagutzeko aukera polita zela iruditu zitzaidan, eta euskararen alde zerbait egiteko modu paregabea eta erraza, gainera.

Ordutik, neronek ere ez dakit zenbat urte igaro diren. Lau, bost, sei, zazpi? Gaur egun, ez dira nire ‘mintzalagunak’, ‘mintza’ hori kendu eta ‘lagun’ hitzarekin soilik geratu dira. Bai, egia da euskaraz mintzatzen garela, baina, jada naturala hori da gugan, gure harremana euskaraz eraiki dugulako. Gure taldea hirukoa da eta nire bi kideak Euskal Herritik kanpo jaio baziren ere, urteetan gure hizkuntza ikasten aritu dira, baita lortu ere. Ez dakit zenbat buelta ematen dituen aditzak euren garunean mihira heldu aurretik, baina ematen dituenak emanda ere, gaurko aukera aprobetxatu nahi dut egin duten eta egiten duten lana txalotzeko. Ez beraiek bakarrik, baita gainerakoak ere; Mintzalagunean dabiltzanak, euskaltegian izena eman dutenak edo euren kabuz ikasten ari direnak. Guztiak txalotu nahi ditut.

Andoaingo Mintzalaguneko hainbat taldetan bideo laburrak grabatu ditugu azken hilabetean. Helburua: Andoainen jendeak proiektua ezagutzea, eta noski, izena ematea. Egitasmo honek bi zutabe ditu: batetik, bidelaria; euskara praktikatu nahi duena. Eta bestetik, bidelaguna. Baina zer lortzen du bidelagunak? Zein den nire saria? Jende berria ezagutzea, euskararen alde norbere aletxoa jartzea, Andoainen euskara kalera ateratzea… Gainera, ongi pasatzen dugu, urtean hainbat ekintza egiten baititugu proiektuaren baitan: txakolindegia, Topic-era (txotxongiloen museoa) irteera, karaokea, bertso-afaria, mendi irteera, errege-opil tailerra… Talde handian ere giro ederra sortu da!

Andoainen egin zen azken neurketaren arabera (2013koa), herriko kaleetan entzundako sei elkarrizketatik bat baino zertxobait gehiago zen euskaraz. Urteak igaro dira, bai, baina egoera aldatu dela uste duzu? Hobera? Okerrera? Zalantzak badituzu, arazo honek kezkatzen bazaitu, zerbait egin nahi baduzu, Andoainen euskaraz bizitzea bada zure ametsa, Mintzalagunean zure zain gaude.

Astean ordubeteko tartea ez duzu bada edukiko? Kanpotik txalotzea baino hobea baita parte hartzea.

Iruzkina Idatzi

Captcha image