Bazkaritarako Txertota jatetxean bildu ziren Goiburu auzoan, eta mahaiaren inguruan makina bat gai izan zituzten hizpide, tertulia gozoa osatuz. Besteak beste, garai batean, umetan-eta, San Isidro baserritarren zaindari bihurtu izanaren arrazoiaren inguruan entzuten zituztenak gogoratu zituzten. Konparazio batera, La Salle ikastetxean ikasleek jasotzen zuten bertsioa aipatu zuen Joxe Joakin Jauregik: “esaten ziguten Isidro izeneko nekazaria mezatara joan zela behin, eta bien bitartean, aingeruak zerutik jeitsi egin zirela eta bere baserriko soruak denak goldatu egin zizkiotela. Eta guk, umeak izan, jota sinistu dena! Gure aurrekoek, amonak eta aitonak-eta, bere horretan joan ziren gure artetik, fede horrekin”.
Aldamenetik, Xabino Alkortak baserritarraren errealitatezko patua gogorazi zuen: "San Isidro egunean ere, egun handia izango da, baina maiz, goizean lana eta arratsaldean lana egitea egokitu zaio baserritarrari".