Miren Amuriza, Amaia Agirre, Maialen Lujanbio, Andoni Egaña, Ion Beloki eta Aitor Mendiluzek San Juan egunean tradizio bilakatu den bertso saioa osatu zuten, joan zen ekainaren 13an. Punttuka bertso eskolako Unai Ormaetxea gai jartzaile lanetan aritu zen. Saioa bideo bidez ikus daiteke, eta zuzenean soilik 30 lagunek ikusteko aukera izan zuten.
Hona bertso aldietako bat. Gaia: “2020ko ekaina da. Andoni Egaña hil egin zaigu. Andoni, hau zure hileta eguna da, eta adiskiderik fidelenak azken agurra ematera etorri zaizkizu. Lagun bakoitzak bizian inoiz aitortu ez zizun hori adierazteko aukera edukiko du. Ondoren, Andonik (bizirik balego), erantzungo liekeena entzungo dugu".
GAIA JARRITA:
ANDONI HIL ZAIGU
Aitor Mendiluze:
Joan da Andoni, gure Andoni,
beti osasun juxtuko.
Ospitalean nola etzuen ba
zigarro hori piztuko.
Poz bat badaukat, txikia baina,
ezin egin diot uko:
behingoagatik argazkietan
ez gaituztela nahastuko (bis)
Andoni Egaña:
Azken agurra entzun Aitorri
eta nola ez berotu!
Nere zigarro ta gure antza
bidatu horiexei lotu
Esango nuke, ai! Mendiluze:
erotu al haiz, erotu?
Nik txapelketan inoiz ez nian
bigarren posturik lortu (bis)
Ion Beloki:
Ai! gure Andoni gaurko honetan
joana zaigu zuloa
parranda askotan jende askori
kendua diozu loa.
Nahiz ta batzutan nei iruditu
zu zarauztar txuloa,
txikitatik zu izan zinen
bertsotako idoloa (bis)
Andoni Egaña:
Bere idolo izan nintzela
pozgarria da puñeta!
Parrandero ere deitu ez dit bat
horri ipiniz arreta!
Arrazoi dauka, jende askorekin
nabil edan ta erreta.
Baina lorikan ez det lapurtu,
norberak egiten du eta (bis)
Maialen Lujanbio:
Lehen nik lehenesten zintudan
Jainko haundien antzera.
Gero errespetu gehiegizkoa
ta egiten nuen atzera.
Gero inbidia ere izan nizun,
zu beti onena zera.
Ta azkenik lagun zintudanean
zu, jata, hil egin zera (bis)
Andoni Egaña:
Nunbait miretsi egiten nindun
nerabe zela hasteko.
Begirunea sortuaz gero
ene zenbat errespeto!
Azkenerako laguna nindun,
enuen asko usteko.
Ene, Maialen hori jakinda
ni kapaz naiz berpizteko (bis)
Amaia Agirre:
Barra ertzean maiz izan zera
patriarkatu noblea.
Gai jartzen zera, Amaia, artista,
a ze nolako lorea!
Eta bertsotan bueno, ba, hortxe
ezin zera aztu ordea.
Zu ere bizirik oso ona zinan,
hilda askoz e hobea (bis)
Andoni Egaña:
Esaten nizun gai jartzailetzan
hoberik ez da aukeran.
Eta bertsotan, bueno, hola hola,
zeuk aitortu dezan eran.
Nola mikroan zorionean
den-denok aldatzen geran,
salto txiki bat sumatu nizun
nere heriotza bezperan (bis)
Miren Amuriza:
Saio ostean kotxea hartuta
banindoan ipurterre.
Andonik, lasai, esaten zidan,
ez etxeratu haserre.
Galdetu gabe enion uzten,
lengoetatik ezerre.
Baina enitzen ausartu esaten
nire kotxean ez erre (bis)
Andoni Egaña:
Sekula ere esan gabea
Mirenek hor utzia, tak!
Pentsatzen nuen hik zigarroa
burmuinetan bertan daukak!
Salpikadero gainetik, aizu,
kenduko al dituzu hankak?
Ni erretzaile bilakatu nau
besteren ausardi faltak (bis)