Txaranga haserre agertu da Udalak emandako erantzunarekin. Osasun neurri guztiak hartuz Andoaingo herritarrak eta kaleak alaitzea zen txarangaren asmoa larunbat honetan, baina hurrengo baterako utzi beharko du. Eguerdi partean Goikoplazatik abiatuta, herriko zenbait puntutan (Nafarroa Plaza, Bastero plaza, Juanita Alkain Plaza, Zumea plaza) joaldiak egiteko baimena eskatu zion Udalari; jo-leku batetik bestera ez zutela musikarik zabalduko zehazten zion Udalari. Udalak, baina, jakinarazi zion hori ez zela posible izango, LABIk kaleko ikuskizun ibiltarien arloan ezarrita dauzkan irizpideek hori galarazten dutelako; aldi berean, Goikoplazan eserlekuekin kontzertua egiteko aukera luzatu zion Udalak.
Txarangak Udalari erantzun dio. Kexati agertu da, bi galdera luzatuz Udalari. Lehenbizi, galdetzen dio ea LABi dekretuaren agindua udalerri bakoitzeko interpretaziopean ote dagoen, “Guk proposaturiko ekimenaren eredua inguruko herrietako udalek babestu eta bultzatu duten ekimenetan oinarriturik dago”. Bigarrenik, galdetzen dio ea nola den posible abuztuaren 16an antzeko kalejira baimentzea, eta aldiz, oraingoan ukatzea.
Azkenik, txarangak Udalari jakinarazten dio bertan behera uzten duela larunbaterako pentsatua zeukan musika ekimena, jarri dizkion baldintzak direla eta.
Santa Zezilian, aparteko kontzertua
Udalarekin egunotan edukitako ezustekoa atzean lehenbailehen utzi eta ahaleginak hurrengo emanaldiko prestaketarako bideratu nahi dutela azaldu dute txarangako kideek. Entseguen dinamika diziplinatuari heldu diote egunotan, La Salle-Berrozpe ikastetxeak utzitako egoitzan. Hain zuzen, musikarien zaindari den Santa Zezilia inguruan kontzertua eskainiko dute. Berezi-berezia izatea espero dute, batetik, zendutako hiru kideei (Luxio Aranburu, Jose Luis Fernandez Fitero eta Pako Bidasoro) gorazarre egiteko baliatuko dutelako, eta bestetik, Joxe Mari Oiartzabalek azken bi urtetan konposatu dituen zortzi abesti jendaurrean estreinatuko dituztelako.