Azken urteetan Asteasun jokatu da Harri Handien Euskal Herriko Txapelketa. Aurtengoan, baina, txapelketa hori Azpeitian jokatu zen. Pasa den abenduaren 7an izan zen eta Aimar Irigoienek altxa zituen kilo gehien, 8.225 kilo, hain zuzen.
Asteasuarrak ez dira txapelketarik gabe geratuko eta Euskal Herrikoaren ordez, 200 kiloko Harri Errektangularraren Txapelketa antolatuko dute. Datorren abenduaren 22an izango da, eguerdiko 12:00etan hasita.
Izen handiko hamabi harri-jasotzaile lehiatuko dira 200 kiloko harriaren aurka: Joseba Ostolaza, Jon Goenatxo, Martin Mendizabal, Gorka Etxeberria, Julen Diaz, Xabier Aranburu, Iñigo Eizagirre, Aimar Galarraga, Inaxio Perurena, Aimar Irigoien, Jokin Eizmendi eta Xabier Peñagarikano. Horietako batzuk lehen aldiz saiatuko dira 200 kiloko harria altxatzen, hala nola Mendizabal edo Etxeberria.
Hiru minutuko bi tanda egin beharko dituzte, nork altxaldi gehiago eman. Berdinketaren kasuan, hiru jasoaldi azkarren ematen dituenak irabaziko du.
Aizkolariak
Abenduaren 31n, urtero legez, Urrezko Aizkolarien Txapelketa ospatuko da 17:00etan, Asteasuko Usarrabi pilotalekuan. Sarrerak egunean bertan erosi ahal izango dira pilotalekuaren atarian