Hirugarren eta azken jardunaldia jokatu zen Galarretan. Ez zen aldaketarik egon sailkapenean, beraz, Juanenea eta Endika lehen finalistak bilakatu dira, eta Goikoetxea V-Barrenetxea IV bikotea txapelketatik kanpo geratu da. Ansa II eta Larrañaga finalerdietara igaro dira bigarren sailkatu gisa; Urriza eta Zubiri hirugarren sailkatu gisa igaro dira finalerdietara.
Urriza-Zubirik eta Ansa II-Larrañagak partiduko helburuak ondo bete zituzten, eta biak finalerdietara igaro dira. Lau pilotariek partida berdindua, zirraragarria eta maila handikoa jokatu zuten. Bikote urdinak irabazi zuen (32-35).
Partida bikaina jokatu zuten, berdindua eta oso teknikoa. Hasiera batean Urriza-Zubiri bikoteak irabaziko zuela zirudien arren, Ansak eta Larrañagak Urrizaren amaierako hutsegiteak baliatu zituzten partidan aurre hartzeko. Norgehiagokaren hasieran Larrañaga nabarmendu zen, baina amaieraldean Urrizak hartu zion erreleboa. Gorridun bikotea 29ra iritxi zenean finalaurrekoetarako txartela ziurtatu zuen, horrek erritmoa lasaitzea eragin zuen, aurkarien onurarako.
Goikoetxeak eta Barrenetxeak bigarren partida jada kanporatuta hasi zuten, lehen partiduko bikoteak finalerdietara igarotzea lortu baitzuen. Hala eta guztiz ere, maila handia erakutsi zuten eta gutxiengoagatik irabazi zuten (35-34). Goikoetxeak txapelketako partidarik hoberena jokatu zuen.
Esan beharra dago, partida oso berdindua izan zela eta edonork irabaz zezakeela. Bigarren partidu hau, aldiz, ikusgarriagoa eta biziagoa izan zen, defentsan akats gutxiago egin zituzten. Hasiera batean bikote urdina gailendu zen Endikaren sakea baliatuz; baina partidak aurrera egin ahala, Goikoetxea-Barrenetxea bikotea aurkariak menperatzen hasi zen. Txapelketako partida hoberenetakoa jokatu zuten arren, ez zen nahikoa izan finalaurrekoetara igarotzeko.
50. urteurreneko txapelketa
3. jardunaldia. 2020/07/04
Urriza-Zubiri 32
Ansa II-Larrañaga 35
Goikoetxea V-Barrenetxea IV 35
Juanenea-Endika 34
Sailkapena:
1.Juanenea-Endika 8
2.Ansa II-Larrañaga 5
3.Urriza-Zubiri 4
4.Goikoetxea V-Barrenetxea IV 1
Finalaurrea:
Uztailak 11, larunbata:
Urriza-Zubiri.
Ansa II-Larrañaga.
Larunbateko partidak ikusi nahi ezkero, bidali mezu bat urnieta@aiurri.eus postara