“Bisitariak etxean bezala senti daitezen ahaleginduko gara”

Nola sortu zen Agerre Berri baserria landetxe bilakatzeko ideia?

Hasieran, lekua eta baserria ikustera joan eta asko gustatu zitzaizkigun eta inongo asmorik gabe erosi genuen, landetxe batean pentsatu gabe. Baina etorri ginenean izugarri handia zela iruditu zitzaigun eta ekonomikoki horri buelta emateko zerbait egin behar genuela pentsatu genuen. Eta horrela sortu zen ideia, gauza batek bestera eraman gintuen. Guk argi genuen hotela ez genuela jarri nahi, egunero bezeroekin eduki beharreko zerbitzu hori ez genuela eskaini nahi, baina landetxe bat jartzea, aldiz, ideia ederra iruditu zitzaigun. Jendeari leku eder eta lasai honetaz disfrutatzeko aukera emateko.

Proiektuarekin urtarrilean hasi ginen eta urrian iada irekitzekotan ginen. Denbora horretan baserria hartu, obrak egin, guztia txukundu eta landetxe batera egokitu dugu. 

Zer eskaintzen duzue Agerre Berri landetxean?

Momentuz prestatuta daukagun apartamentua 5-6 pertsonentzako egokituta dago. Familia, bikote, lagun kuadrilla, mendizaleak, langileak… Berdin digu, baina giro lasaia mantentzea eskatzen dugu, hori guretzat oso garrantzitsua baita. Leku lasaia da eta guk ere horrela izaten jarraitzea nahi dugu; baserriak eta lekuak eskaintzen duenari berdina eman nahi diogu. Egonaldiari dagokionez ez dago epe mugarik, asteburu bat, egun bat, astebete edota nahi adina egon daiteke. 

Zer nolako harrera jaso duzue herrian?

Oso ona. Asko poztu dira, horrelako zerbait egitera animatzegatik. Kontutan hartu behar da aspalditik utzita zegoen baserriari eta lekuari bizia eman diogula. Udaletik ere oso ondo portatu dira, izugarri lagundu digute. Bizilagun asko honen parte ere izan dira, laguntza handia eman digutelako.