Euskarak lagun askotxo ditu Urnietan, eta ia guztiek ere Euskaraldiarekin bat egin dute. Joan zen igandean, jaietan bakarrik lor daitekeen parte-hartzea ikusarazi zen San Juan plazan. Ia mila lagunek jarrera aktiboari eutsiko diote, azaroaren 23tik abenduaren 3ra. Ez da datu makala, euskarak lagun asko dituen seinale. Lagunak, ordea, ez daude maitatzeko bakarrik. Maitatzeko, eta gozatzeko ere bai. Euskara erabiltzea, horixe izango da onena. Belarrian eta ahoan, euskara gogoan.
Dantza eta bertsoa
Egapek, ohiko duenez, dantza erakustaldia eskaini zuen plazan. Oraingoan, Euskaraldiaren kantaren koreografia alaia eskainiz. Joxeba Lizeagak maisuki aurkeztu zuen ospakizuna, behin eta berriz Euskaraldian parte hartzeko deia luzatuz. Txalo zaparrada eskatu zuen Euskaraldia antolatzen dabiltzanentzat. Merezi dute. Ospakizunaren beste osagaietakoa bertsoa izan zen:
Fermin Argiñarena:
Urnietarrok esnatu gera,
plazan dago seinalea.
Konpromisoen garaia da hau,
bagera euskalzaleak.
Ta euskalduntzen hasi etxetik,
ta euskaldundu kalea.
Egunez egun jarri dezala
bakoitzak bere alea.
Joxe Mari Mujika:
Bakoitzak bere hondar aleaz
etorriko da ordaina,
ta Urnietan gertatu dana
ez ote dugu hazaña.
Politikoak ere alkartu,
denak batu alajaina,
orain belarrik presta ditzagun
eta dantzatu mingaina.
Andoni Mujika:
Plaza betea ageri da ta
danak alkartuta omen.
Eta euskaraz hitz egiteko
aukera badugu hemen,
dantza eta aditu aipatu dute
ezin da hartu atseden,
baina gauza ez da dantzatze hutsa
baizik nola dantzatzen den.
Bertso eskolako kideak
Izaskun Labat eta Gorka Iturbe kantari aritu ziren ere, Bertso eskolaren ordezkari gisa:
Bertso kantari nahi dugu
guk Euskaraldia hasi.
Hamaika egun hauetan
aurreiritziak hautsi.
Nahiz batzutan iruditu
gaudela euskaldun gutxi,
gaudenon indarrarekin
behar dugu gogor eutsi.
Zuk aukeratu zer izan:
Belarriprest, Ahobizi,
ta gakoa non dagoen
ikusiz ikusarazi,
dakitenek hitz egin ta
ez dakitenek ikasi.
Adierazpena
Amaiera emateko, ehundik gora lagun seinalatuk konpromiso publikoa hartu zuten.