Laburuk eta Gaztelumendik beren buruaz barre egiteaz gain Urnietako Alkatea eta apaiza ere zirikatu zituzten zenbait unetan Lekaion osatu zuten bertso saioan. Hona segidan, bertso saioko zenbait ale:
Agin Laburu:
Saio txikia izaten degu
guk urteroko baldintza.
Egun luzea izanagatik
ez degu hartzen paliza.
Orain saio hau egingo degu
lenoko meza baililtza,
tortilla eta txorixoakin
ta plastikozko kaliza.
Beñat Gaztelumendi:
Hemen gabiltza, beraz, kaliza
eskuartean hartuta.
Sagardo pixkat eman didate
ta ohartzerako buka.
Halare hemen jendea nunbait
ederki dago zainduta.
Apetitua gutxinez bate
etzaizu bajatu ta.
Agin Laburu:
Hona etortzen gerala, Beñat,
badituk bizpahiru urte.
Patxiren partez eskuminak e
eman behar genituzke,
eta gure meza txiki hontan
bentaja degu, ez uste.
Hemen guztiak eseri eta
altxa beharrik ez dute.
Beñat Gaztelumendi:
Esertzen eta jeikitzen hemen
eztegu izango lanik,
etzazuela pentsa mezetan
sarri ibiltzen geranik.
Halare lana egin dezagun
biok abilak izanik,
apaizarena zuk egintzazu
monagiluarena nik.
Agin Laburu:
Monagiluan papela ere
ez zait gaizki geratzen ño!
Baina behin etorri geranean,
Beñat, Urnietaraino
meza, apaiza, baserrritarrak
protagonistak gaurdaino.
Monagiluana hobeto egingo dek
baserritarrana baino.
Beñat Gaztelumendi:
Nere garaian egina nago,
Agin, baserriko lana.
Baina gerora egin nuenez
Donostia aldeko plana.
Monagilo ta apaizarena
egin degu erdi bana
ta alkateak egin dezake
Espiritu Santuana.
Agin Laburu:
Ederra bota dek orain Beñat,
espirituan faltan.
Alkatea gure atzean
lanetik ez dabil bakan,
bilera ba omen du ta
hemen daukagu nolatan.
Bera hor dago baina nork daki
espiritua non daukan.
Beñat Gaztelumendi:
Beti ibiltzen da espiritua
jartzeko borondatean.
Ez da errexa izan beharra
alkate hemen ta alkate han,
beti arduren, beti hitzaldien
ta beti kezken menpean.
Hiru bilera egiten ditu
bilera bakar batean.
Agin Laburu:
Hemen jendia bildu zaigunez
ez gerta eskuin aldera.
Zeozer entzun nahian ere
bildu dira mahaigainera.
Zu ta biok mikrofonotik
alkateaz ari gara,
irudi honek ez dirudi
kanpainaren hasiera?
Beñat Gaztelumendi:
Kanpainarako ez da izango
horren hizlari abilik.
Bakar-bakarrik atzian falta
lema txiki bat zintzilik.
Hamaiketako hontan pasa da
gauza berezi bat soilik:
bertsolariak kantuan baina
politikoa ixilik.
Agin Laburu:
Politikoa ixilik dago
eman nahi luke ordaina.
Hi eta biok halare orain
nola hartu degun gaina.
Bera erdian, gu albotara
jarri gaituk alajaina,
guardaespaldasak izan gintezken,
pintarik ez dugu baina.
Beñat Gaztelumendi:
Nik pinta handirik ez det horrena
eta Aginek ba te du?
Gu bi biok ezin gaitezke izan,
Agin, zaintzale eredu.
Halare hemen mikroa beste
askori kentzen diegu.
Alkateak ta apaizak baino
gehiago agintzen degu.
Agin Laburu:
Alkatea ta apaizai jarri
haiz orain, Beñat, begira.
Hik afirmatu egin dek baino
horrek bazeukak segida.
Apaiza ta alkatearen
aginte hortatik tira,
gehiago agintzen degula baino
hori asko edo gutxi da?
Beñat Gaztelumendi:
Asko edo gutxi den ez dakit ba
eta erantzun zergatik:
etzazu uste bide onera
goanez bide hortatik.
Edozer gauza botazen degu
mikrofono batetatik
Pixka bat gehiago agintzen degu
baina hobeto ez dakit.