Ospeak protagonistaren zereginak biderkatu ohi ditu. Espainiako Vuelta amaitu bada ere, Mikel Iturriak atseden hartzeko nahikoa tarterik ez du izan. Hedabideei elkarrizketak eskaini, proposamen ezberdinei arreta jarri..., aspertzeko tarterik ez dute izan Iturriak eta bere inguruak. Horixe da ospearen zama.
Astearte iluntzean Iturriaren koadrilakoek lehen omenalditxoa eskaini zioten, San Juan plazan. Agurra dantzatu zioten, txapela jantzi eta bertso batekin amaitu zen ospakizuna. Ez da jasoko duen emanaldi bakarra izango, emozioz beteriko asteburua datorkio urnietarrari
Omenaldia Urnietan, ostiralean arratsaldeko 18:00tan hasita
Herri omenaldia egingo diote ostiral honetan, arratsaldeko 18:00tan San Juan plazan. Talde ezberdinek bat egingo dute Iturriari gorazarre egiteko.
Andoainen bigarren omenaldia, 12:00tan Zumea plazan
Udalak antolatutako "Mugitu Andoain" ekimenaren baitan, haur eta gazteek Iturriarekin batera bizikletan ibiltzeko aukera izango dute. Goikoplazatik Trentxiki aldera abiatuko dira, goizeko 10:00tan. 12:00ak aldera Zumea plazara iritsiko dira. Azken zatian Mikel Iturria batuko zaie. Plazan bertan, Txirrindulari eskolak eta Udalak omenduko dute.
