"Zergatik gatozen Andoainera? Ondo eginda dagoelako. Halaxe da, Gipuzkoan gehiago badaude baina honen parekorik ez. Ikusten da Andoaingoa profesionalek egin dutela. Skaten aritzen direnek egin dutela, alegia. Aieteko Pagola parkean badago beste bat, ona. Baina hango pistak Andoaingoak baino sakontasun handiagoa du". Horiexek dira Aiurriri skater heldu batek egindako adierazpenak. Minutuak aurrera igaro ahala, zaletu gehiago hurbiltzen ari dira. Eta Allurraldetik Goikoplazarako bidean, patinetean bat baino gehiago ikusten da Allurralderako norabidean.
Zabaldu dutenetik, skatepark berria ezagutzera zaletu ugari hurbiltzen ari dira. Eta horietako askok esperientzia errepikatu dute. Geroak esango du, baina gaur gaurkoz pista berriak zaletuen oniritzia jaso du. Gurpilen gainean, orduak eta orduak eskainiz, estreinaldia egiten ari dira.
