Antzerkia, pilota partidua, kultur lehiaketa… Ez da erraza definitzen "Frontona" ikuskizuna, baina kontua da zapore gozoarekin utzi zuela Goiburun bildu zen publikoa. Iñaki Urruzolak zuzenduta frontoian hara eta hona etengabe ibili ziren bost aktoreek (Janire San Sebastian, Anne Maiza, Unai Ormaetxea, Josu Artutxa eta Iñigo Otaegi) publikoarekin harreman interaktiboa lortu zuten, bikain asko lortu ere. Euskal Herriko kulturaren ezagutzan sakontzea helburu zuten hainbat galdera eginez batera, umorea barra-barra erabili zuten, eta maiz lortu zituzten ikusleen barre-algarak.

San Esteban Jai Batzordeak antolatuta, iraganeko San Esteban jaiei lotutako argazki erakusketa ikusga dago frontoian, abuztuaren 3a bitarte. XX mendeko 30eko hamarkadakoak dira zaharrenak, eta azken urteetan ateratakoak berrienak. Goiburuko auzotarrek zein kanpotik bertaratutakoek San Esteban jaiak nola ospatu izan dituzten erakusten du irudi sortak, izan zuri-beltzez izan koloretan. Erakusketa, egunotan ospatzekoak ziren jaien ordez antolatu den kultur egitarauren ekitaldietako bat da.