Oilo-ipurdi azala

Epaimahaiak irrintzien lau ezaugarri hartu zituzten aintzat: irrintziaren iraupena, doinua, indarra eta amaiera. Irrintzi bana bota behar zuten, eta berdinketa edo zalantzarik egonez gero errepikatu. Halakorik, ordea, ez zen behar izan; irabazleak Nerea Arriaga Azkue oriotarrak bota zuen irrintziak ez zuen parekorik izan eta entzule guztien txalo-zaparrada indartsua jaso zuen, entzule askoren aupa! Eta brabo! oihuen artean. Oilo-ipurdi azala jartzeko moduko irrintzi dotorea izan zen, luzea, indartsua, doinu apartaz eta amaiera bikain batekin egin zuena. Beste horrenbestekoa izan zen behin saria irabazita urnietarrei berriro eskaini ziena.

Bigarren saritua ez zen atzean gelditu, Naiara Plaza Elordi berriatuarrak ere irrinzi bikaina egin zuen, entzule eta epaimahaikideen onespena jasoz.

Oro har, oso maila onekoa izan zen lehiaketa, sailkapeneko puntuazioetan ikus litekeen legez. Bitxikeria gisa, orain bi urte egindako lehenengo lehiaketako irabazle Arantzazu Garmendia donostiarra hirugarren sailkatu zen eta, laugarren, Urnietan bizi den Fernanda Paz kolonbiarra. Baina Nerea Arriagak ez zuen bere mailako aurkaririk izan, bai irrintzi bikaina!!

14 urtetik beherako haurren atalean Jon Tolosa Jover urnietarra izan zen irabazle, bigarren urtez jarraian.

Juan Mari Arizmendi jaunak, Maria Arizmendi zenaren ilobak  eman zizkien irabazleei garaikurrak eta diru-sariak; irrintzi irabazleak 100 €-ko saria eraman zuen.