Kafea Eco ekimena Ekograsen zerbitzu paraleloa da, eta kafe-hondakin guztiak birziklatzea du helburu. Aldundiak zabaldutako oharraren arabera, “munduan 161 milioi kafe-zaku kontsumitzen dira eta 20.000 milioi kapsula zaborretara botatzen dira urtero. Ostalaritzako hondakinak zabortegian amaitzen ziren, kafe-kapsulak bezala, edukiontzi horia ez baita leku egokia. Gaur egun, Kafea Ecok kafetik eratorritako hondakinen %100 birziklatzeko gaitasuna du”.
Enpresa talde berekoa da Ekogras, sukaldean erabilitako olioa biltzeko zerbitzu integrala eskaintzen duen enpresa. Garatu duten sistema telematikoaren bitartez, Aldundiak bidali duen oharraren arabera, olio-ontziak biltzen dituen makina noiz dagoen beteta jakin dezakete. Jakinarazpenak jaso ondoren, olio-ontziak biltzen dituzte eta azterketa eta mantentze-lanak egiten dituzte.