Kultur Aretoa bete egin zen herriko kirolari gazteen solasaldia entzuteko. Aurretik 'Zazpi, kontakizun bat tontorrez tontor' dokumentala eskaini zuten eta 19:40 aldera hasi zen solasaldia. Kirolari gazteek euren bizipenen berri eman zuten. Izaro Etxarri txirrindularia da eta marka handiak lortu ditu dagoeneko. Pistan indartsu dabil eta bere kirolean dauden modalitate ezberdinen berri eman zuen. Hamazazpi urte besterik ez baditu ere, kirolak hainbat bizipen eman dizkio dagoeneko eta haien berri eman zuen. Kirolak berekin dakarren diziplina ere aipatu zuen gazteak bere hitzartzean.
Pilotan dabil Xuhar Iparragirre (15 urte). Europako txapelketatan izan zen udaberrian eta bertan jokatutako modalitate ezberdinen berri eman zuen. Trinketean ere badabil Iparragirre gaztea eta Gipuzkoako txapeldun da egun. Kirola egiteko gomendioa zabaldu zuen gazteak.
Hamalau urte ditu Nahia Garcia futbolari gazteak. Andoaingo Euskalduna taldean eman zituen lehen pausoak; Antiguokon aritu zen ondoren, eta Athletic-eko kadete taldean ari da gaur egun. Bizitza aldaketa ekarri dio horrek Adunako gazteari. Izan ere, Bilbon bizi baita egun. Kirolak eskaini dion aukera hori azpimarratu zuen adunarrak.
Gaur iluntzean txotxongilo ikuskizuna izango da Elordin eta ondoren, ohiko talo afaria egingo dute pilotalekuan.