Egun guztian zehar, 17 ekoizleren garagardo ezberdinak dastatzeko aukera izan zen eta baita AMA tabernako kideek eskainitako mokadu goxoak dastatzekoa ere. Aurten, lehenengoz, herriko artisauen lanak ezagutu eta eskuratzeko aukera ere eskaini zuen pilotalekuaren atarian jarritako artisautza azokak. Lurgi Zalakain eta Nahikari Iturbek Kaori faktoriako lanak erakutsi zituzten, Amets Zalakainek eta Selene Martinek hainbat margolan, Beñat Iraolak Zatzaizkit serigrafia taldeko lanak edota Susana Carreterok, Sualma egurrezko jostailuak.
Antolatzaileek egunaren balorazio positiboa egin dute, guztia ondo joan zela azpimarratuz. Zozketako zenbaki saritua 223a izan zen. Azokan eskaini ziren 60 garagardo artisauak eta Oria merkatarien elkarteko saltokietan gastatzeko 150 euroko erosketa-txartela eskuratuko ditu irabazleak. Hori bai, ekainaren 1a baino lehen jarri beharko du harremanetan antolatzaileekin infobeertoki@gmail.com helbide elektronikoaren bitartez.