Musika-taldearen aukeraketa bi fase desberdinetan burutuko da:
Lehen fasean, taldeak proposatzeko aukera izango dute herritarrek, baldin eta Amasa-Villabonan erroldatuta badaude eta 2005 urtean edo lehenago jaioak badira. Horretarako, talde baten izena proposa dezake herritar bakoitzak ondoko e-mailera idatzita: kontzertubozketa@gmail.com. Taldeak proposatzeko epea maiatzaren 31n hasi eta ekainaren 4an 00:00etan bukatuko da. Herritar bakoitzak behin bakarrik proposa dezake talde bat (ez gehiago), bere izen-abizenak emanda.
Behin proposatutako talde guztiak dituztenean, talde bakoitzak ondoko bi baldintza hauek betetzen ote dituen egiaztatuko dute kultura saileko arduradunek:
- Uztailaren 26an Villabonan jo ahal izatea.
- Ekintza horretarako jarri den udal aurrekontuan sartzea.
Bigarren fasea ekainaren 7an hasi eta ekainaren 10eko 00:00etan bukatuko da, eta bertan bi baldintza horiek betetzen dituzten proposamenen artean bozkatu beharko da. Dena den, talderen bat proposatu duten guztioi gogoraraziko diete berriz ere.