Koronabirusa

Iluntzeko azken txaloak festa-giroan, Malkar plazan

Konfinamendua hasi zenetik, gainerako auzoetan bezala, iluntzero balkoi eta leihoetan bildu da Villabonako Malkar plazako auzotar asko, osasun langileei txalo zaparrada eskaintzeko. Txaloen ondoren, megafonia bidez aireratutako kantu bati eman zaio tartea egunero. Horrez gain, ostegunetan nahiz egun berezietan auzoko musikariek zuzeneko emanaldiak eskaini dituzte, musika-tresnak balkoi edo leihoetara aterata.

Gaurkoan, iluntzetako txaloen txandari amaiera eman aurretik, aste hauetan etxetik aritu diren musikariak Malkar plazara atera, eta bertan eskaini dute emanaldia. Besteak beste, 'Txoriak txori' kantua edota herritarrentzat hain ezaguna den Villabonako martxa jo dituzte. Musikariei nahiz osasun arloko langileei eskainitako txalo zaparradaren ostean, fandangoa eta arin-arinaren txanda iritsi da. Auzotarrez gain, plazako terrazan eserita zeuden herritar ugari animatu da dantza egitera. Festa-giroa sortu da plazan. Giro polita.

 

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!