Orain arte, puntu iluna
Bide honek orain arte ez zuen inolako argiztapenik, eta puntu ilun nabarmena zen. "Gainera, bide hau jende dezentek erabiltzen du; futbol entrenamendura joaten diren gaztetxoek, ikasleek, Otelarre auzoko hainbat bizilagunek... eta udalak egindako inbertsio berri honekin, ondo argiztatutako bidea da eta segurtasunean asko irabazi du", jakinarazi dute udaleko kideek.
Kontsumo gutxiko argiteria
Argiteria publiko honetan LED teknologiadun argiak jarri dira faroletan; kontsumo gutxikoak izateaz gain, energia eraginkortasun egokia dute. Guztira, 16 argi-puntu edo farola berri ezarri dira. "Aipatzekoa da hauek ezartzeko obra udal brigadako langileek egin dutela, udalaren baliabide propioak erabiliz. Bestalde, proiektu hau herriko argindar kontsumo publikoaren eraginkortasuna bermatzeko martxan dagoen energia planean ere jasota dago".
Emakumeen segurtasuna bermatzea helburu
Inbertsio berri hau, udalak martxan duen puntu ilunak identifikatu eta desagerrarazteko garatu duen plangintzaren baitan kokatzen da, eta, batez ere, emakumeen segurtasuna bermatzea du helburu.