Santioak 2020

Segurtasun neurriak zorroztuko dira festa girorik ez sortzeko

Amasa-Villabonako Udalak arduraz jokatzeko deia egin du, azken egunetan sare sozialen bitartez zabaltzen ari den botiloia egitearen ideiaren aurrean. Neurri bereziak hartuko dira datozen egunetan.

Hauxe da Amasa-Villabonako Udalak kaleratutako oharra:

Udalak arduraz jokatzeko deia egiten du

Udalak jakin du azken egunetan Tolosaldea eta Goierriko hainbat gazte eta nerabe taldetan asteburu honetan parranda egitera Villabonara joateko eta Komizarko parkean makro-botiloi bat egiteko deialdiak zabaldu direla.

Honen aurrean, Amasa-Villabonako Udalak honakoa adierazi nahi du:

Villabonako Santio Jaiak bertan behera geratu direla gogorarazten dugu. Ez da jai egitaraurik izango eta tabernen ordutegia murriztu egin da.

Jendarteari eta bereziki inguruko herri eta eskualdeetako herritarrei, Villabonara festa eta parranda egitera ez etortzeko eskaera egiten diegu.

Gogorarazi nahi dugu adin txikikoei alkoholdun edariak saltzea eta botiloia egitea debekatuta daudela.

COVID-19aren zabalpena saihesteko 10 lagunetik gorako taldeetan biltzea debekatuta dago eta oso garrantzitsua da arduraz jokatzea eta ezarri diren segurtasun arau guztiak ondo betetzea.

Udalak honako neurri bereziak hartzea erabaki du:

  • Komizar parkera doan bidea itxi egingo da eta udaltzaingoak zaintza berezia egingo du inguruetan, botiloirik egin ez dadin.
  • Udala Ertzaintzarekin harremanetan jarri da, herriko sarbideetan eta tren geltokian kontrol neurriak ezar daitezela eskatzeko.
  • Udaltzaingoak aipatutako arau-hausteak egiten dituzten pertsonak identifikatu eta salatuko ditu, salbuespenik gabe.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!