Aurtengo otsailean Amasako bizilagun talde batek, errepidearen egoera txarrarekin kezkatuta Udalera jo zuen irtenbide bila. Amasa-Villabonako Udalak oharrean azaldu duenez, "errepideak ez ditu oinarrizko segurtasun baldintzak betetzen ez autoentzat, ez eta oinezkoentzat ere, eta ezbeharren bat gertatzeko arrisku handia dago". Udalak herritarren kezkarekin bat egin du, eta Villabonatik Amasara doan GI-3751 errepidearen egoera konpontzeko urratsak ematen hasteko konpromisoa hartu du. Horretarako ezinbestekotzat jotzen du Gipuzkoako Foru Aldundiako Bide Azpiegitura sailarekin elkarlanean aritzea.
Zentzu horretan, Amasa-Villabonako udal gobernuak, egoera konpontzeko, eta errepidea segurua izan dadin, egin beharko liratekeen lanak jasoko duen aurreproiektu bat osatuko duela jakinarazi dio Foru Aldundiko ordezkariei. Horretarako 15.000 euroko diru partida bat bideratuko du Udalak. Aurreproiektu horrek definituko ditu egin beharreko lanen xehetasun teknikoak etaaurrekontuaren estimazioa ere jasoko du. Ondoren, Udalak Amasako herritarrei eta Aldundiari aurreproiektuaren berri emango die.