Udalak adierazi duenez, "Eremu naturalek eta berdeguneek mesede handia egiten diete haur txikiei, izan ere, ingurune natural batean aurki ditzaketen “pieza askeekin” askatasuna eta burujabetasuna lantzen dute eta eurek gidaturiko jolasen bidez, mundu eta istorio kolektiboak sortzen dituzte. Gainera, gela barruko ikasketa-eredua zail egiten zaie hainbat haurrei eta onura handia dakarkie jolastoki aberats eta praktikoa izateak."Horregatik, Udalak jolas eremu natural bat sortuko du Amasa-Villabonako Seaska haur eskolako kanpo espazioan, haurrek haurtzarotik naturarekiko lotura eta zaletasuna garatu dezaten. Naturgune honen bidez, bizi-estilo osasungarrietara ere bideratu nahi dira haurrak.
Seaska haur eskolako alboan jarriko den jolas eremu naturala sortzeko lanek honako ezaugarriak izango dituzte:
- Egungo kautxozko lurzorua kenduko da eta bertan dagoen etxola lekuz aldatuko da. • Belar artifizialaren azalera berri bat ezarriko da.
- Akazi egurrezko enbortxoak eta pergola berri bat jarriko dira.
- Hondarrarekin jolasteko eremu berri bat sortuko da.
- Tutu handi bat jarriko da, haurrek jolasteko.
- Triangelu formako egurrezko elementuak jarriko dira.