Villabona, 2025eko irailaren 27a. Minbiziaren Aurka Gipuzkoan elkarteak aurten ere elkartasunez bete ditu Villabonako kaleak gaur egin den Minbiziaren Aurkako 2. Mendi martxaren edizioan.
Guztira, 320 lagunek hartu dute parte ekimen solidario honetan. Horrela, aurreko urteko arrakasta errepikatuz, aurtengoan ere, Villabona berdez estali da jardunaldi honetan. Bildutako guztia elkarteak pazienteei eta haien senideei doako zerbitzuak eta arreta eskaintzen jarraitzeko erabiliko da.
Gipuzkoako gizarteak elkartasuna adierazi dio elkarteari
Beste behin ere, Gipuzkoako gizarteak elkartearekiko elkartasuna eta konpromisoa erakutsi du. Izan ere, herritarren parte-hartze eta Mendi martxako izen ematean bildutako diruari esker, elkarteak eskaintzen dituen doako zerbitzuetan (terapia psikologikoa, arreta soziala, material ortopedikoaren mailegua, etab.) gero eta paziente eta senide gehiago artatzeko helburua lortu ahal izango da. Gainera, jarduera honen bitartez, kirolak eta elikadura osasungarriak minbiziaren prebentzioan duen garrantzia erakutsi nahi izan da.
Mendi martxaren 2.edizio honetan 9,8 edota 7,7 kilometrotako ibilbidea egiteko aukera egon da. Herritar guztiei zuzendutako proba solidario hau 09:30ean hasi da eta Berdura Plaza izan da irteera eta helmuga.
Mendi martxaren ondoren, parte-hartzaile guztiek hainbat jardueraz gozatzeko aukera izan dute: aisialdi ekintzak (Irrika aisialdi Taldearen eta Real Sociedad Fundazioaren eskutik) eta baita buruhandiak eta erraldoiak ere (Besamotza Konpartsaren eskutik).
Minbiziaren Aurka Gipuzkoan elkarteak eskerrak eman nahi dizkie alde batetik, Villabonara hurbildu eta bere parte-hartzearekin elkartasuna adierazi duten pertsona guztiei. Beraien laguntzari esker, elkarteak minbizia duten paziente eta senideei doako zerbitzuak eta arreta eskaintzen jarraitu ahal izango baitu. Bestetik, elkarteko boluntario guztiak eskertu nahi ditu egindako lanagatik, izan ere, haiei esker jardunaldi hau aurrera eramatea posible izan da.
Minbiziaren Aurka Gipuzkoan Elkarteak eskerrak eman nahi dizkie CMO Valves enpresari beste urte batez, martxaren babesle nagusia izateagatik, Amasa Villabonako Udalari eta Aizkardi Mendizale Elkarteari beraien ezinbesteko laguntzagatik eta baita edizio honetan parte hartu duten gainerako babesle eta kolaboratzaileei: Garaje Tolosa, Irudek, Iveco, Jaguar, Jamai, Iparfrío, Irrika Aisialdi Taldea, Real Sociedad Fundazioa, Beroa, El Diario Vasco, Ataria, Noticias de Gipuzkoa, Besamotza Konpartsa, Solan de Cabras, Olaederra kiroldegia, Gurutze Gorria eta Irrintzi elkartea.