Amasa-Villabonako Udalak, Oria Merkatarien Elkartearekin elkarlanean, kontsumo bonoen VIII. kanpaina abiatuko du tokiko merkataritzari bultzada berri bat emateko asmoz. Egitasmoa irailaren 19an jarriko da martxan eta abenduaren 30era bitartean egongo da indarrean, edo esleitutako bonoak agortzen diren arte. Guztira, Udalak 57.000 euroko inbertsioa bideratuko du ekimen horretara, herritarrak tokiko saltokietan kontsumitzera animatzeko eta bertako ekonomia biziarazteko.
Aurtengo kanpainan herriko 41 saltokik eman dute izena, eta establezimendu horiek erraz identifikatzeko "Bonoak hemen salgai" kartela jarriko dute erakusleihoetan. Udal ordezkarien esanetan, tokiko komertzioa Amasa-Villabonaren oinarri nagusietako bat da, eta erosketak herrian egitea ezinbestekoa da herri bizi-bizia izaten jarraitzeko.
Bono digitalak eta deskontu zuzenak
Aurreko urteetako sistemari eutsiz, bonoak ez dira paper fisikoan inprimatuko. Dendariek zuzenean aplikatuko dute deskontua erosketa egiteko unean bertan, eta, beraz, ez da beharrezkoa izango bonoak aurrez eskuratzea. Bono bakoitzak 5 euroko balioa du,eta gutxienez 15 euroko erosketa egin beharko da deskontu bakar bat aplikatzeko.
Erosketaren zenbatekoaren arabera, honela banatuko dira deskontuak:
- 15 €-ko erosketa: 5 euroko bono 1
- 30 €-ko erosketa: 5 euroko 2 bono
- 45 €-ko erosketa: 5 euroko 3 bono
- 60 €-ko erosketa: 5 euroko 4 bono
- 75 €-ko erosketa: 5 euroko 5 bono
- 90 €-ko erosketa: 5 euroko 6 bono
Baldintzak eta informazioa etxez etxe
Bonoen abantailaz baliatzeko baldintza bakarra erosleak 16 urtetik gorakoa izatea da, eta NANa aurkeztu beharko da saltokian. Ez da kontuan hartuko bezeroa herrikoa den ala ez, eta pertsona bakoitzak gehienez 6 bono erabili ahal izango ditu establezimendu bakoitzean.
Herritar guztiek informazioa eskura izan dezaten, Udalak esku-orri bat banatuko du herriko etxe guztietan kanpainaren xehetasunekin eta parte hartuko duten 41 saltokien zerrenda osoarekin.
