Ana Carrere alkateak egin ditu bozeramaile lanak, eta alboan izan ditu PSE-EE, EAJ-PNV, Ganemos eta Irabaziko ordezkariak. Hots, Udal ordezkaritza osoa. Eta haiekin batera Marce Garcia Stop Desahucios ekimeneko ordezkaria. Kide gehiagok osatzen dute Etxebizitza mahaia: Fiare, Caritas edota Gizarte Zerbitzuetako teknikariek.
Sei etxebizitza horietatik hiru premia berezia duten herritarrei eskainiko zaizkie (desgaitasuna duten pertsonak, guraso bakarreko familiak, alargunak, genero indarkeriaren biktimak, banatze prozesuan edota bananduta egon eta euren kargu pertsona gehiago dituzten kasuak, etab). Beste hirurak multzo orokorra deitzen zaion taldeari eskainiko zaio. Etxebizitza horietako bat eskuratu ahal izateko prozedura maiatzaren 6an abiatuko da. Udalak eta maizterrak hitzarmena sinatuko dute, 3 urte eta 5 urte artekoa. Informazio gehiago, Anbrosia Olabide eraikinean eta Andoain.eus webgunean.
Udalaren jabetzakoak diren sei etxebizitzak egokitzeko 230.000 diru partida inbertitu da.
