40 bat lagun bildu ziren Olazarko parkean, eta Gurutze Gorriko kideekin batera uretako neumatikoetan abiatu ziren Leitzarango ibaian behera. Bekoplazako parera iristea zuten asmoa. Bidean dauden hiru presek eragindako trabak gainditu ostean, helmugara iritsi ziren. Azken zatian jende mordoa zeukaten zain, errekaren bazter batean zein bestean.
Eguzki talde ekologistak antolatu ohi du ekimena, eta helburu aldarrikatzailea itsasten dio. Leitzaran ibaiak eta bere arroak babes osoa eduki dezaten eskatzen du, eta horretarako bailara parke naturala izendatzea ikusten du egokia. Azken urtetan, bigarren aldarrikapena erantsi du: ibaira isurtzen jarraitzen diren ur-beltzak bideratzea.
