Segurtasun sailak adierazi duenez, Andoainen 48 eta 51 urteko bi gizon atxilotu zituzten ostegunean, saltoki batean lapurtzera sartu eta jabeak horietako bat dendan giltzaperatu ostean.
Gertakaria eguerdian jazo zen Zumea plazako merkatalgune batean. Gizonak dendara sartu ziren kutxako dirua ostutzeko asmoz, baina jabearekin topatu ziren. Horietako bat kanpora irten zen, aldiz saltoki barruan zegoenak nagusiarekin borrokatu eta erasotu egin zuen. Jarraian, jabeak dendatik irtetzea lortu zuen eta erasotzailea barruan giltzaperatu zuen.
Memento horretan, dendariak laguntza eskatu zuen eta inguruan zebiltzan pertsonak laguntzera gerturatu ziren; segituan, Ertzaintza eta Udaltzainak ere bertaratu ziren.
Azkenean, ertzainek ustezko bi lapurrak atxilotu eta Tolosako Auzitegira eraman zituzten; atxilotuek aurrekari penalak zituzten.