Konduktismo ariketa itsuan ohetik dutxara dutxatik sukaldera sukaldetik kalera kaletik lanera joaten ginen. Mundua geratzera doala dirudienean, hortxe daude enborra adarra hostoa lorea. Egunak aurrera doaz eta leihora begira jarrita nago, leiho hori beste leihoa izan zitekeela imaginatuz. Hemen izanik, han naiz.
LEIHOKO BULTZITIK
trenean joaten naizenetan
begiak beti batez
larrea bere belarrean
atea bere atalagan
ganbara bere teilan
teila bete katu
katea bere zakurrean
lantegia bere labean
tximinia bere kean
kea bete datu
trenean joaten naizenetan
begiak beti bakez
zubia bere ibaian
ibaia bere gurpilean
eliza bere kanpaian
kanpaia bete lantu
mendia bere tunelean
zuhaitza bere habian
habia bere arrautzan
arrautza bete kantu
trenean joaten naizenetan
begiak beti lanez
bidea bere burdinan
burdina bere greban
zerua bere hilerrian
hilerria bete santu
plaza bere tabernan
gaua bere geltokian
geltokia bete espantu
espantua bete babes
joaten naizen trenetan
biziak beti trabes
Parisen bizi naiz, Koldo Izagirre (Susa. 2013, poesia)