EZEREZA HUTSA BADA
Ezereza hutsa bada
hutsa arina bada
eta arina erraza
ez dut ezer izan nahi
Eta bukaera gelditzea bada
gelditzea atsedena
eta atsedena atsegina
bukatu egin nahi dut
Eta joatea agurtzea bada
agurtzea isiltzea
eta isiltzea lasaitzea
joan egin nahi dut
Eta heriotza loa bada
loa ametsa
eta ametsa askatasuna
hil egin nahi dut
Baina hiltzea uztea bada
uztea baztertzea
eta baztertzea mintzea
ez dut hil nahi
Eta joatea hastea bada
eta hastea saiatzea
saiatzea nekatzea
ez dut joan nahi
Eta bukatzea etsitzea bada
etsitzea galtzea
eta galtzea umiltzea
ez dut bukatu nahi
Eta ezereza gaua bada
eta gaua iluna
eta iluna beltza
zerbait izan nahi dut
Ione Gorostarzu , 2012