"Biologiak esnatzeko eta lan egiteko grina ematen dit"

Zergatik biologia?

Umetatik gustuko izan dudan zerbait da. Aitak eragin handia eduki du zentzu horretan nigan. Gogoan dut:helduagoak ginenean zer ikasi nahi genuen galdetzen zigutenean, nahiko argi nuen animalien arlotik joko nuela. Baina garai hartan ez nekien biologia zer zen, ez nuen ezagutzen. Ostera, oso argi eduki dut beti nire bizibidea zein izango zen. 

Batxilergoan guztiak zer ikasi zalantzati zeudenean, nik garbi nuen zer ikasi nahi nuen, animaliak ikustea eta aztertzea izugarri gogoko baitut; eta Leioan biologia ikasketekin hasi nintzenean, erabaki egokia izan zela ohartu nintzen. Bete-betean asmatu nuen. 

Zer jasotzen duzu biologo izatetik?

Bizia. Esnatzeko eta lan egiteko grina ematen dit. Egun batzuetan, ingeleseko irakasle lanak amaitu, eta goizeko hirurak arte fauna aztertzen egon izan naiz. Nabari dut,gustuko zerbait dela. Esaterako, hainbat proiektutan murgilduta nago leporaino, baina nik nahi izan dudalako. Horrelako lanek helburu bat ematen didate bizitzan. Nire ustez, guztiok hori bilatzen dugu. 

Biologian, zein da zure espezialitatea?

Bi master egin nituen: bata irakaskuntzan eta bestea biodibertsitatean. Hala ere, nire ustez, espezialitateak hiru dira; dibulgazioa, ornitologia eta psikologia ebolutiboa. Nabarmendu nahi dut oraindik ez naizela ornitologoa, titulua ateratzeko lanean ari naizela. Lan handia egiten ari naiz. Eta psikologia ebolutiboaren gaineko ziurtagiririk ez dudan arren, nire kabuz formatu naiz eta jakintza asko barneratu dut. Askok galdetuko duzue zer den azken hori: bada, egungo gizakiaren portaera nolakoa den  aztertzen duen esparrua,  miloika urteko bilakaera oinarri hartuta. 

Laburki azalduta, zertarako balio du biologiak?

Gogoan daukat unibertsitateko lehen egunean klasera sartu ginenean; irakasleak biologoak ginela eta bizitza aztertzen genuela esan zigun. Latinez honela da, "bio" bizitza eta "logos" aztergaia. Hasieran, neure buruari galdetzen nion: nola aztertuko dugu bizitza? Mamukeria hutsa zela pentsatu nuen. Buruari eraginda, biologiak adar eta azpi-zientzia ugari ditu, azalera oso handia hartzen du. Nire ustez, gaur egungo zientzia garrantzitsuena da biologia. 

Nola bistaratzen duzu fauna eta natura etorkizunean?

Batzuen aldetik guztia hobetzeko esfortzua eta lana handia da. Aurrekoan, katamotzen berreskurapenari buruzko grafiko bat ikusi nuen; bertan, argi dago arrakasta handia edukitzen ari dela; kopurua handitzen ari dela ikus daiteke. Aldi berean, tigreen populazioa ere handitzen ari da. Lan izugarria eta ona egiten ari dira leku askotan.

Bestalde, ikuspegi globalaren egoera ez da batere ona. Azkenean, "mugimendu berdea" delakoaren akatsa gaiaz dakitenek ez dutela agintzen eta agintzen dutenek ez dakitenen hitzak jasotzen dituztela da. Zera esan nahi dut, agintariek masak dioena egiten dute eta horiek –nire errespetu guztiarekin– ez dakite zertaz ari diren. Orduan, munduko energia guztia eolikoan oinarritu behar dela esatean, baina, era berean, horien efektua hegaztien biziraupen tasan benetan kaltegarria dela ikustean, gauzak birplanteatzen hasten zara. Nire ustez, agintzen dutenek ez dute ekologismo berdea egiten ona delako, jendeak eskatu eta bozkak irabazten dituztelako baizik. Esaterako, haize-errotek sortzen duten energia garbia da, kakotsen artean; baina egitura horiek biodibertsitatean duten eraginaz ez du inork hitz egiten, eta arazoa larria da. Eguzki-panelekin arazoa antzerakoa da. Teoria oso polita da, baina 5-10 urteren buruan hausten direnean, Afrikako zabortegi batean amaitzen dute, gehienak ez baitira birziklagarriak.

Ez hori bakarrik, inork hitz egin nahi ez duen gaia, argi eta garbi, zentral nuklearrena da. Eduki duen fama txarraz eta akatsez haratago, gaur egun, energiaren eskaera kontuan hartuta eta eredu garbi bat jarraitu nahi dugula jakinda, nuklearraren laguntzarik gabe energia berdeak ez luke irteerarik edukiko. Errealitatea da. Horrez gain, begiratu beharra dago, energia nuklearraren aurkako kanpainetan diru gehiena ikatz eta petroleo industriek mugitzen dutela. Eurak badakite energia nuklearra fidagarria eta segurua dela eta ez zaiela komeni aldeko iragarkiak edukitzea; bestela, pikutara joan daitezke. Mundu honetan, gauzak ez dira zuriak edo beltzak. 

Gogoan eduki ezazue, energia berdearekin soilik gure gizartearen kontsumo elektrikoa ezin da eutsi. Agian, 20 urteren buruan, teknologian aurrerapausoak egingo dira, bai. Egun, ez.