Azken asteetan bazkidetze eta federatze kanpainari heldu diote, besterik egin ezean. Fernando Otamendi zuzendaritzako kidea topatu dugu egoitzan, zeregin horretan.
Nola doa bazkidetze eta federatze kanpaina?
Txukun, aurreko urteen gisara. Federatzeari dagokionez, elkar konpentsatzen ari diren bi errealitate dauzkagu: batetik, Euskaldunarekin ibiltzera ohituta dauden inguruetako asko beren herrietan ari dira federatzen. Bestetik, artean federatu ez den jende berria ari da izena ematen; konfinamenduak mendizaletasuna piztu egin baitu. Dagoeneko, ia 200 bat pertsona federatu dira. Iazko 266ko kopurura iritsiko gara.
Nola izaten dira prezioak?
Federatzeko bazkidea izan behar da. Kuota arrunta 22 eurokoa da; 60 urtetik gorakoek doan, 11 euro federatzen badira. Bestalde, 18-23 urte bitartekoek, kuotaren erdia ordaindu behar dute. Guztira, 460 bazkide ditu Euskaldunak.
Federatzeak dakarren segurua Estatu mailakoa 101 eurokoa da, eta Pirinio mailakoa 117 eurokoa (86 euro jubilatuek). Gehienak Pirinioetakoa hartzen dute, Frantzian erreskateak garesti ateratzen baitira.
Euskaldunak ekintza ugari antolatu ohi ditu urtean… Nola daramazue, osasun-krisialdia hasiz geroztik?
Martxoak 8 bitarteko irteerak normal burutu ziren, baina, hortik aurrera, batez. Uztailean saiotxo bat egin genuen: Aralar aldera irteera antolatu genuen. Baina etsigarria gertatu zitzaigun. Mendizaletasuna talde giroan naturaz gozatzeko aukera ematen duen ekintza dela iruditzen zaigu, eta egia esan, ikusi genuen oso zaila dela ideia hori gauzatzea; denbora gehiago egin genuen segurtasun neurriak bete zitezen, gozatzen baino. Era horretan, bazterrean geratu ziren gertuko nahiz Pirinioetako irteerak, Aste Santuko Alacanteko irteera, Andoaingo ibilaldia, mendizale astea, urteko batzarra… Bagenuen itxaropena Adarrako Urteberriko salda emateari ekiteko, baina keba! Itxaropena ez da galdu behar, jakina, eta ziur gaude aurten berrekin ahal izango diogula betiko dinamikari. 2020ko egutegia bete gabe daukagu, eta horri helduko genioke, Aste Santukoa kenduta. Makina bat mendizale gogo biziz gaude, betiko irteerak noiz hasiko ote diren…
Urteko batzarra ez zenuten egin.
Helduak dira bazkide asko, Andoaindik kanpokoak hainbat… Zaila da baldintza egokietan batzar bat egitea. Gainera, zuzendaritzaren aldaketari heldu behar zaio. Oraingo taldeak bi urterako konpromisoa hartu zuen, eta, aurrera begira, inor aurkeztu ez zenez, hirugarren urtea bete dugu; geroztik, administrazioko lanekin ari gara kunplitzen.
Elkarrizketa osorik, Aiurri hamaboskariaren 576. zenbakian
-----------------------------------------------------------------------------------------------------
Aiurri aldizkaria harpidedunek soilik jasotzen dute etxean. Harpidedun ez denak kioskoan eros dezake hamaboskaria eskualdeko ondoko saltokietan:
- Andoain: Ernaitza eta Stop liburu-dendak.
- Amasa-Villabona: Basajaun liburu-denda eta Amasa kafetegia.
Harpidedun egin nahi izanez gero, horretarako aukera zuzena eskaintzen du www.aiurri.eus webguneak, klik bakarrera. Gainerakoan, albiste honen bukaeran ere baduzue Aiurrikide egiteko aukera.