Euskal herritar gutxi animatu ohi da First Dates saioan parte hartzera, eta ez da harritzekoa makina bat andoaindarrek Cuatro telebista sintonizatu izana astelehen gauean, are gehiago jakinda herrikide aski ezagun bat agertuko zela bertan.
Bost bikotek osatu zuten ordu bete iraun zuen saioa, eta jada sarean zabaldu dute. Astelehenean telebista piztu ez zuenak Joseba eta Consoren arteko egonaldia honako lau tarteetan zatituta ikus dezake : 11:30-14:38, 18:02-20:33, 31:38-34:06, eta, 43:13-46:50.
Saioko egileek mutila “animatua eta alaia” gisa aurkeztu zuten, eta emakumea, berriz, “bere baitan blindatua, baina animatua” gisa.
Nork bere burua definitzerako orduan, Arabaolazak bere burua jendartekotzat eta dantza zaletzat jo zuen; Consok, borrokalaria eta ausarta zela esan zuen. Aurreneko ikusi aldian urduri zeudela aitortu zuten biek ere, baina maiz egin zuten barre afarian zehar.
Afariaren amaieran, bigarren hitzordua edukitzeko gogoz al zeuden galdetuta, baiezkoari eutsi zioten biek ere.