Garrantzia handia eman dio Udal gobernu taldeak gaurko agerraldiari, bertan izan baitira Maider Lainez, Andoaingo alkatea, Mari Jose Izagirre alkate-ordea, eta Petri Romero eta Alexander Huitzi gobernu taldeko zinegotziak. Lainezek deialdiaren irekitasuna nabarmendu du: "Andoainen egiten den lehen aldia da, eta gastu publikoari buruzko eztabaida eta erabakiak hartzea herritarrei zabaltzeko helburu argiarekin sortu da, aurrekontuak egiten parte har dezaten”. Izagirrek 2019-2023 gobernu-programan jasotakoari men egiten dion egitasmoa dela berretsi du: “Andoain Elkarlanean dinamika barruan kokatzen dela, herritarrekin dugun interakzioa hobetzea helburu duena”. "Andoain. Erabaki Orain" izeneko komunikazio kanpainaren bidez, parte hartze prozesuaren irismena handitzea helburu dute.
Proposamenak aurkezteko epea zabalik da
Udalak inprimaki bat prestatu du eta on line edota paperean aurkezteko aukera izango da. Etxebizitza guztietara iritsiko da eskuorria, eta 16 urtetik gorako andoaindarrek Andoain.eus bidez edo hainbat buzoitan aurkeztu ahal izango dituzte proposamenak.
- Webgunea: Andoain.eus. Prozesuari buruzko informazioa eta inprimakia bertan aurki daitezke.
- Buzoiak: Udal eraikinetan ipiniko dituzte proposamenak aurkezteko ontziak: Ataria, Allurralde, Ambrosia Olabide, Bastero, Udaltzaingoa, Urigain Etxea, Arrate, Gazte lokala, Liburutegia, Ludoteka.
Lau urrats, proposamen hutsa errealitate bilakatu arte
- Ekainak 18-Uztailak 18: Proposamenak aurkezteko bidea zabalduko da.
- Uztaila-Iraila: Udal-teknikariez osatutako batzorde batek aztertuko ditu jasotako proposamenak.
- Urria: Aukeratutako proposamenak hautatzeko bozketa egingo da.
- Azaroa: Bozka gehien jasotakoak 2022ko Udal aurrekontuetan txertatuko dira.