Gogoko izan zuen Andoaingo zenbait herri ekimenetan parte hartzea. Besteak, beste, aipatzekoak dira soldaduskaren aurkako mugimendu intsumisoko kidea izan zela, Axeri Dantza dantzatu izan zuela Goikoplazan zenbait urtetan, eta Burdina elkarteko boluntarioa ere izan zela azken urtetan.
Ondare historikoa berreskuratzea eta argitan jartzea helburu duen Burdina elkarteak atsekabea agertzeaz gain doluminak luzatu dizkie senideei. Elkarteko kideek azaldu dutenez, Iradik ederki asko barneratu zuen boluntarismoaren filosofia; beti edukiko dute gogoan berreskuratze lanei eman zien bultzada pertsonalaz gain, zabaldu zuen lagunarteko giroa.
Intsumisoen ahotsa Santa Krutzetan
80 eta 90eko hamarkadetan zehar antimilitarismoaren eta derrigorrezko soldaduskaren kontrako mugimenduko parte-hartzaile ekintzaileenetakoa izan zen Andoainen. 1994ko Santa Krutzetan berak egin zuen pregoia Olajaunaneko balkoitik, Andoaingo intsumisoen ahotsa bilakatuz. Presoaren janzkeraz azaldu zen balkoian, estatuak intsumisioari ematen zion erantzun errepresiboa salatzeko.
+Gizartean sustraitutako mugimendua izan zen hura Espainiako estatuan, eta batik bat, Euskal Herria guztian. Datu argigarri bat topatu dugu orduko hemerotekan, fenomeno sozial haren dimentsioa azaltzen diguna: Andoainen, Iradik pregoia eman zuen urte hartan, 19-24 urte bitarteko 70 gazte baino gehiago intsumisoak ziren. Gainera, une hartan Julio Abrego preso zegoen, eta beste hainbat lagun edozein unetan atxilotua izateko zorian zeuden, "bilatze eta harrapatze" egoeran egoteko atarian, alegia. Jada 1992an, herriko bi gazte, Imanol Huizi eta Asier Garmendia lehen intsumiso presoak izan ziren estatu osoan.
Iradi eta beste milaka gazte ausarten jarrera tinkoari esker, azkenean, 2001ean, Espainiako gobernuak bertan behera utzi zuen derrigorrezko soldaduska.
Kirolari trebea
Gaitasun fisiko handiko mutila zen, eta kirol ugaritan jardun zuen, futbolean, pilotan, mendizaletasunean... Futbolean aurrelari bizkor eta bizia izen zan umetatik, eta Euskalduna taldean infantilen eta jubenilen kategorietan jokatu ostean, preferente mailan ere jarraitu zuen zenbait denboraldietan, 80eko hamarkadan.
