Josune Agirre eta Manu Telletxea Mimendi kaleko bizilagunak N-1ean pankartarekin jartzen segitzen dute goizero-goizero Bazkardo eta Kalonge auzoaren arteko pasabidean, trafikoak eragiten dituen zaratentzat irtenbideak eskatuz. Eta jokabide horri eusteko prest agertzen dira; are gehiago, astearte eta ostegun arratsaldeetara luzatu dute protesta.
Orain hilabete bat, Andoainen 5.100 sinadura bildu zituzten zaratari aurre egiteko pantailak eskatuz; guztiak Andoaingo Udalari aurkeztu zizkioten, eta aldarrikapen horren aldeko mozioa onar zezan lortu zuten, Aldundiari eskaera zuzentzeko. Orain, Agirrek eta Telletxeak Aldundiaren erantzunaren zain segitzen dute.