Rikardo Arregi Kazetaritza Sariaren epaimahaiak izendatu ditu aurtengo finalistak. Bi sari nagusi emango dira, biak maila berekoak, bederatzina mila eurokoak: “Kazetaritza saria” bata, eta “Komunikazio saria” bestea. Bi sarietarako launa finalista izendatu ditu epaimahaiak. Zortzi finalista horien arteko bi izango dira, beraz, aurtengo RAKSen saridunak. Hona finalistak:
Kazetaritza saria
- Berria egunkarian argitaratutako Ahomentan elkarrizketen seriea
- Beñat Zalduak idatzitako Nola iritsi gara honaino seriea (Gara)
- Zaballako espetxetik egindako Faktoria saioa (Euskadi Irratia)
- Urtzi Urrutikoetxeak idazten duen Leku-Lekutan izeneko atala (Berria)
Komunikazio saria
- Oier Aranzabalen Barruan gaude podcast-a.
- Basilika podcast-a.
- 3000twitz kolektiboa.
- Pantailak euskaraz egitasmoa.
Finalisten artetik azkenean bi saridunak nortzuk diren -Kazetaritza sariko irabazlea bata eta Komunikazio sarikoa bestea- sari banaketa ekitaldian jakingo da. Sari banaketa ekitaldia azaroaren 19an izango da, ostiralarekin, Andoainen, Bastero Kulturgunean, iluntzeko 19:00etan egingo den ekitaldian. Finalistak ere bertan izango dira, eta beraiek ere orduan jakingo dute, ez lehenago, nortzuk diren saridunak.