Pantailatik jarraitzea ikusgarria izan da, eta horren isla Aiurritik zabaldutako argazkiak eta bideoak. Baina hainbat eta hainbatentzat ardura handiko orduak izan dira. Etxabeak, negozioak eta bestelako ondasunak dituzten herrikideentzat kezkaz beteriko orduak dira.
Eguerdi partean egoera egonkortu egin da, baina ez dago erabat lasaitzeko motiborik oraindik. Eguraldiaren iragarpenaren arabera, Gipuzkoako alde honetan oraindik ere eguraldia euritsua izango da. Eta ur-emari hain handia duten ibaietan ezer gutxi behar izaten da ibaiek berriro gainezka egiteko.
????#AlertaLaranja #euria #Uholdea
— Euskalmet (@Euskalmet) December 10, 2021
????Gipuzkoan, euriagatik bihar, 09ak arte
????Por lluvia persistente en Gipuzkoa hasta mañana a las 9 h
????#AbisuHoria
????Bizkaian eta Araban euriagatik, bihar, 09ak arte
????Por lluvia persistente en Bizkaia y Álava hasta mañana a las 9 h. pic.twitter.com/Y39nodRja0
Kale Nagusia eta Zumea kalea, ostiral arratsaldean
Merkataritzak garrantzia berezia du bi kale horietan, eta kasu batzuetan negozioak itxita izan dira eta beste batzutan normaltasun osoz aritu dira. Hori bai, denak ere zuzenean edo zeharka ibaira begira egon dira. Gauari begira zer? Atzokoan bezain besteko alarmarik antzematen ez den arren, merkatalgune gehienetan atzoko neurri beretsuak hartuko dituzte. Baita Santa Krutz elizan eta Caritasen egoitzan ere.
Jokabide baikorra dutenen artean dago Santa Krutz frutadenda. Diego Barragan fruta saltzaileak atzokoan atean itxitura berezia jarri zuen, ahalik eta ur gutxien sar zedin. Gaurkoan ez du horrelakorik egingo, okerrena pasa den ustekoa baita. Virgina Jimenez lankidearekin batera lanean ari zen, ostiral iluntzean. Barragan lasaiago dago: “Goizean Udal langileek zubian zeuden enbor handienak kendu izanak lasaitasuna eman dit. Tenperatura igo egin da eta mendietatik urtu daitekeen elurra gutxitu egingo dela ondorioztatzen dut. Gaur gauean ez dut aparteko neurririk hartuko”.