Garaipen asko lortu dituzue bi taldeek norgehiakoetan. Martxa ona, ezta?
Olatz Dieguez: Bai. Gainera, aurten, senior taldea atera dugu, eta ez genuen espero hainbeste garaipen eskuratzea. Lehiakortasun handia al dago aurtengo denboraldian?
Izaro Tapia: Partida zailak ere izan ditugu, baina talde gisa nahiko ondo ari gara jokatzen, eta oso pozik gaude.
Zein aurreikuspen egiten zenuten denboraldi hasieran?
O.D.: Gure kasuan, berria zen taldea, eta denboraldia egin ahal izatea zen gure helburua. Hala, emaitzak ez zitzaizkigun hainbeste axola.
Zaila egin al zaizue, Olatz, taldea ateratzea?
O.D.: Bai. Ia talde osoa bigarren urteko jubenilok osatzen dugu. Senior kategoriako taldekideak ere badira, baina justu.
Oro har, postu onean zaudete. Urnietaren pareko zabiltzate, goran.
O.D.: Gainera, nire ustez, Urnieta da gure erronka handiena.
Jubenilei dagokionez, zer moduzkoa izaten ari da liga, Izaro?
I.T.: Iragan denboraldian uste baino hobeto gelditu ginen, positiboa izan zen emaitza. Aurten ere gustuora gabiltza; izan dugu partida zailarik.
Nolakoak dira entrenamenduak?
O.D.: Hiru entrenamendu izaten ditugu: astean bi egunez, jubenilekin batera entrenatzen dugu seniorrok. Horrez gain, nork bere kabuz entrenatzen du egun batean, asteko partida prestatzeko.
Pandemiak eraginik izan al du zuen jardunean?
O.D.: Aurten, ez hainbeste; iaz, gehiago. Gehienak txertaturik gaude, eta, emaitza negatiboa jasoz gero, ez dugu zertan konfinatu.
Zein aurreikuspen egiten duzue datorren urteari begira?
I.T.: Hiru partida gelditzen zaizkigu jokatzen ari garen liga amaitzeko. Ez dakigu zer datorren ondoren. Hori horrela, bigarren postua eskuratzen ahaleginduko gara, gutxienez. Nahiz eta aukera galdu dugun mailaz igotzeko.
O.D.: Urnietari irabaztea da gure helburu nagusia. Bestalde, mailaz igotzea ere ederra litzateke.