Errumaniako errezetak dastatu dituzte, “Su-artean, Gure-artean” ekimenaren eskutik

“Ongi Etorri Eskolara" egitasmoaren bidez "Su-artean, Gure-artean" ekimena Ontza elkartera eraman zuten atzo arratsaldean. Andoainen bizi diren Errumaniako Maria Paniccik, Ana Vladeanek, Romina Tepesek eta Gabriela Diosek beren herrialdeko platerrak 40 pertsonentzat prestatu zituzten.

Hiru errezeta prestatu zituen laukoteak, hain zuzen: oilasko zopa, txahal-sarmalea eta papanasi errumaniarra.

Errumaniako platerrak prestatzen, Ontza elkartean

 

Gizarte Zerbitzuetako sailak antolatu zuen ekimena, eta jatorri errumaniarreko lau herritarrek ez ezik, Ontza elkarte gastronomikoko bazkideek, kulturarteko talde eragiletako kideek eta Andoaingo hiru ikastetxetako familiek hartu zuten parte.

Antolatzaileek adierazi zutenez, ekimenak inklusioan sakontzen laguntzen du, “sukaldean ari garen bitartean elkar hobeto ezagutzeko” baliagarri da.

Azaldu zutenez, ikasturte honetan egingo diren bost saioetako bigarrena izan da hauxe. Aurrez, otsailaren 17an, Andoaindarra elkartean, Marokoko jatorria duten Hasnae Zannouti eta El Hassania Ofateren eskutik, eta La Salle Berrozpeko IGEren laguntzarekin, beren herrialdeko hiru errezeta prestatu zituzten, eta bertaratu zirenek horiek dastatzeko aukera eduki zuten.

Andoaindarra elkartean, Hasnae Zannouti eta El Hassania Ofate Marokoko jakiak prestatzen aritu ziren, otsailaren 17an.

 

Su-artean, Gure-artean ekimeneko parte-hartzaileak, Andoaindarra elkartean.

 

Andoaindarra elkartean, Marokoko platerrak dastatzen mahaiaren bueltan.

 

Hurrengo saioetan, Brasil eta Euskal Herriko errezetak ezagutu eta dastatu ahal izango dira, besteak beste.

 

 

Errumaniako hiru errezeta

Hona Errumaniako jatorria duen laukoteak prestatu dituen hiru errezetei buruzko xehetasunak.

 

*Oilasko zopa:

Osagaiak: azenarioa, tipula, apioa, peregila, semola eta arrautza. azenarioa

Nola prestatu: Oilaskoa eta barazkiak irakiten dira. Bolak egiten dira semola eta arrautza oratuz eta zopari gehitzen zaizkio.

 

* Txahal-sarmalea:

Osagaiak: Txahala-haragi xehatua, aza-hostoak, arroza, tipula, baratxuria, piperbeltza, piperrautsak eta begeta.

Nola prestatu: Haragia arrozarekin, tipularekin eta espeziekin nahasten dugu. Nahasketa aza-hostoetan bildu eta irakiten jartzen da.

 

* Papanasi Errumanoa:

 Osagaiak: Gaztanbera, arina, arrautza, banilla, esnegaina, azukrea, limoia, bikarbonatoa eta mermelada.

Nola prestatu: osagaiak nahasten dira era bolatxoak eginez frijitu. Mermelada gehitzen da zerbitzatu aurretik.

Erlazionatuak

“Su-artean, Gure-artean” Ontza elkartean

Andoain

“Ongi Etorri Eskolara" egitasmoaren bidez "Su-artean, Gure-artean" ekimena Ontza elkartera eraman zuten atzo arratsaldean, eta bertan jatorri...
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!