Santakrutzak '22

Santa Krutz jaietako Ezpata Dantzarien Kofradia

Santa Krutz eguneko Banderaren Jaitsieraren eta Ezpata dantzarien ekitaldi publiko guztia amaitu eta gero, dantza saioan parte hartu duten zenbait eragilek egunari segida eman ohi diote, Errekaburu elkartean bilduz. Hain zuzen, Ezpata Dantzarien Kofradiako kideen bazkaria izaten da. Ez da ohiko bazkaria, hala ere; izan ere, plazako dantzak ez ezik, elkarte barruko ekitaldi horrek ere zenbait protokolo bete behar izaten baititu, honako bideoan Maite Sagasetak kontatu digun bezala:  

Bideoan ikusi daitekeen moduan, aurtengo maiatzaren 3an goizez Santa Krutz ermitaren inguruan dantzan aritu ziren ezpata dantzariak, aurreko urtetan aritutako dantzariak, edota, Ezpata Dantzaren tradizioa berreskuratzen lagundu duten Juan Antonio Urbeltz eta Iñaki Arregi bildu ziren bazkari horretara. Eta jaki ederrez gozatzeaz gain, Ezpata Dantzarien Kofradiari dagozkion zenbait arau bete zituzten.

Ezpata Dantzari buruzko erreportajea, Dantzan.eus-en

Dantzan-.eus web orriak, euskal dantzen gainean gaur egun sarean dagoen web orririk osatuenak, Andoaingo Ezpata Dantzari buruzko erreportajea eta Amaiur Aristi eta Egoitz Irazabalbeitia argazkilariek egindako argazki bilduma ere argitaratu ditu.

Erreportajean, Ezpata Dantzako eta Brokel-dantzako zikloko dantzak (Zinta Dantza, Uzta Txikiena, Brokel Dantza eta Makila Handiena) irudiak biltzen dira, eta aldi berean, 2008an ohitura berreskuratzen lagundu zuen Iñaki Arregiren, Asier Garmendia dantzari-buruzagiaren eta Maite Sagaseta dantza-maistraren adierazpenak ere tartekatzen dira.

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!