Sari banaketaren ondoren, Ontza elkarteak omenaldia egin zion Javier Portuburu kirolariari. Eliteko lehiaketetan daraman ibilbide oparoa aitortu nahi izan zion Ontza elkarteak. Izan ere, Portuburuk hogeita hemezortzi txapelketa ofizial ditu lortuak eta ia ehun domina, Gipuzkoa, Euskadi, estatu edo nazioarte mailako lehiaketetan. Hainbat modalitatetan eskuratu ditu: hobi olinpikoan, ehiza ibilbideetan eta abarretan. Ontzako ordezkari Joxe Mari Tolosak oroigarri bat eman zion, eta guztien artean eskerrik beroena aitortu zion Andoain eta Ontzaren izena munduan barrena zabaldu duelako. Bertan ziren ehiztariek txalo zaparrada jo zioten hunkituta zegoen Javier Portuburu kirolari handiari.
