Xabatek irailaren 25ean abestu zuen Arrasateko kanporaketan, azken orduan Xabier Silveira ordezkatu behar izan zuelako. Anaiarekin batera abestu zuen, gainera. Kanporaketa hartan Joanes izan zen onena, eta bigarren sailkatu zen Saioa Alkaiza. Xabat laugarren sailkatu zen. Arrasaten hasi eta Nafarroa Arenaraino jarraitu du lehian,Joanesek. Ia hiru hilabeteko ibilbidea egin du, horrenbestez, aurtengo txapelketan. Arrasaten aritu eta gero, Elizondon eta Bilbon abestu zuen. Final handia zain du orain, Nafarroa Arenan igande honetan ospatuko dena.
Bertsolari Txapelketa Nagusian biak ala biak ezagun egin dira, ikuslego zabalarentzat. Bertsozaleentzat, aldiz, ez dira hain ezezagunak. 2019ko Nafarroako Bertsolari Txapelketako finalean, esaterako, kantari aritu ziren bi anaiak. Joanes Illarregi Marzol (Leitza, 1999) eta Xabat Illarregi Marzol (Leitza, 2001), maila harrigarria ematen aritu ziren bertsolari txapelketa hartan.
Leitzarrak badira ere, sustraiak Andoainen dituzte. Ama bertakoa baitute, Josune Marzol Ormazabal, hain zuzen. Amona, berriz, Maria Dolores Ormazabal zuten.
Joanes, Kaletxikiko jaietako saioan
Joanes Illarregi San Pedro egunean kantari aritu zen, Kaletxikiko jaietan. Berrozpeko kaperan aritu zen Ion Beloki, Jon Mendiluze, Jone Uria, Nerea Elustondo eta Amaia Agirre bertsolariekin batera. Gaztea izanik, eta Andoaingo sorburua izanik, ospakizun nagusiak gogoan izan zituen bertso saioaren agurrean:
"Atsaldeon Andoain,
gaur zeru soltea.
Ni hemen naiz
parranda galantak botea.
Lehenik Santakrutzean
nolako trotea,
Sanjuanetan zaila da
etxen egotea,
baina beti onena
da azken kolpea".
Xabat, Bertsolari Txapelketan
Xabat anaiak ere parte hartu du txapelketa nagusian. Ezustean izan zen, Xabier Silveiraren ordez aritu baitzen Arrasateko kanporaketan. Agurrean hauxe abestu zuen:
"Arriskurik gabe ez
omen da lorpenik,
ez eta tentsiorik
gabe sormenik.
Nahiz badakidan
hitza bakarrik zor det nik,
ai bertsoa,
lehenago esango bazenit,
ze ez nuen uste nik,
gaur hemen nintzenik.
Sorpresa behin behinik,
badatoz azkenik,
baina nork dio
gehiago ez datozenik".