Auzoko makina bat lagun bildu zen Ontzan bertan antolatu zen agurreko ekitaldira, txokolate jatean parte hartuz. Zenbat daukaten estimuan adierazi nahi izan zioten era horretan. Bizilagunek, oroigarri gisa, lepokoa edo zintzilikarioa eman zioten. Lepokoak, Berrozpe etxearen irudiarekin batera, kaletxikitar askorentzat diren bi leloak, “Gora Kaletxiki, Gora Ama Kandida!”, grabatuta dauzka.
Pakitak berak eskerrak eman zizkien opariagatik, eta zera aitortu: “oparirik ederrena, zuek hemen ikustea da!”. Kaletxiki eta kaletxikitarrak bihotzean betirako eramango diotela ere gehitu zuen.
Lizasok 1955ean jantzi zuen Jesusen Alabak kongregazioko habitua, eta geroztik hamarkadetan han-hemen irakaskuntzan jardun zuen. Horietatik, bederatzi urte Andoaingo Berrozpeko ikastetxean egin zituen.
