Elikagai bilketa dela eta, Mediterraneo itsasoa zeharkatzeko sortu diren logistika arazoak medio, Saharako errefuxiatuen kanpamentuetara eramateko herriz herri urtero jasotzen den janaria kopuru oso zehatzetara egokitu behar izan dugu; horregatik ezin izan dugu ohi bezala dendetan herritarren ekarpenak jasotzen egon, baina jakinarazi nahi dizuegu ikastetxeen bidez 1.300 kilo janari lortu direla, eta Oronak emandako diru laguntzari esker Hurria Saharak erositako elikagaiekin guztira Andoaini zegokion helburua bete dela: gure herrian 1.800 kilo jaso dira eta Gipuzkoan guztira ia 20.000 kilo.
(A
Munduan konpontzeke dauden gatazka horietako bat da Saharakoa; lurralde okupatuetan errepresioa da nagusi, eta errefuxiatu kanpamentuetan egoera larriagoa bihurtu da 2022ko urrian 1991etik indarrean zegoen su etena hautsitzat eman zenetik. Lurraldea banatzen duen harresi militarraren inguruan ordudanik istiluak egunerokoak dira eta biktima ugari sortu dira soldadu marrokiar, saharauiar eta zibilen artean: azken kasu honetan, Marrokiar dronek gutxienez zibilen aurkako 61 eraso egin dituzte, 80 pertsonei eraginez, gehienak saharauiak dira baina baita mauritaniar eta argeliarrak ere.
Testuinguru honetan, oso garrantzitsua da otsailaren 23an Andoaingo Udalak onartutako adierazpen instituzionala: akordioen artean nabarmentzekoak dira udalbatzako alderdi guztiek onartutako bi hauek: "Espainiako Gobernuko presidenteak Mendebaldeko Sahararekiko Marokoren autonomia-proposamena defendatzean izan duen jarrera aldaketa salatzen dugu " eta "Mendebaldeko Sahara Lurralde Ez Autonomoa dela, Nazioarteko Zuzenbidearen menpekoa, inoiz ez da Marokoko Erresumakoa izan, eta, horregatik, Mendebaldeko Sahararen legez kanpoko okupazioa bertan behera uzteko eta Saharako Herriak autodeterminaziorako duen eskubidea gauzatzea ahalbidetzeko exijitzen diogu." Aiurrik osorik jaso zuen adierazpena eta oso interesgarria da gaur egungo Sahararen egoera ulertzeko.
Azkenik, martxoaren 19an Basteroko Areto Nagusian urteroko bertso saioa izango da Punttuka Eskolarekin lankidetzan. Bertsolari hauek parte hartuko dute: Alaia Martin, Amets Arzallus, Oihana Iguaran, Aitor Mendiluze, Maialen Lujanbio eta Sustrai Colina. Sarrerak salgai daude jada Stop, Ernaitza, elgado eta Urrats-en.