Aurkezpenera hurbildu ziren Iker Galartza eta Joseba Usabiaga, Gure Zirkuko ordezkariak. Iker Galartzak hitza hartu zuen aurkezpen-ekitaldian: “Batzuetan, topikoa dirudi esateak mundu magiko batean murgiltzen garela zirkuarekin, baina egi galanta da hori! Pozik gaude Andoainera gatozelako eta gure mundu magikoa Oria ibai ondoko zelaian jarriko dugulako: trapezistak, malabaristak, pailasoak, musikariak… Denetik dauka gure zirkuak, eta hori guztia, gure hizkuntzan!”.
Adin guztientzako ikuskizuna dela nabarmendu du Galartzak, “adin txikikoak pozik etortzen dira, eta zer esanik ez helduak eta aitona-amonak!”. Umorea erabili du gonbitea herritar orori zabaltzeko: “Plan zoragarria eta paregabea izan daiteke andoaindarrentzat eta inguruentzat. Santa Krutz festak bukatu berritan izango dira andoaindarrak, denak aje pixka batekin, alegia, eta gu alaitasuna ekartzen eta elkar-banatzen saiatuko gara”.
Gure Zirkua Miranda Pasealekuko zelaian (haur parkearen eta frankismoko biktimen aldeko eskulturaren artean) kokatuko dute, eta ondorengo emanaldiak egino ditu: maiatzaren 5ean, ostirala (19:00); maiatzaren 6an, larunbata (16:30 eta 19:30); maiatzaren 7an, igandea (12:00 eta 18:00); maiatzaren 12an, ostirala (19:00); eta maiatzaren 13an, larunbata (16:30 eta 19:30).
Sarrerak, dagoeneko, gurezirkua.eus webgunean erosi daitezke, eta baita zirkuaren karpan bertan ere, maiatzaren 2tik aurrera. Bertako txarteldegian eskuratu ahal izango dira.