Harreman ona dago auzoetako jai batzordeen eskutik. Ezaguna zen hori, eta gaurkoan armonia erakutsi dute herritar askoren aurrean.
Jai Batzordeak eragile hauei eman nahi izan die protagonismoa, gizarte bizitzan garrantzia handia dutelako. Hauspoa ematen diotelako herrigintzari. Auzo herria da Andoain, eta gaurkoan zazpiak bat agertu dira.
Karrikako jaiak, Buruntzako jaiak, Sorabillako jaiak ospatzeari utzi behar diogu? Ez! Entzun da argiro, ikusleen aldetik. Jai Batzordeetako kideek lagun berriak behar dituzte, antolakuntzarekin jarraitzeko. Auzolanean murgiltzeko deia egin dute, gaurkoan.
Maitane, Kepa, Nika, Ainhoa... Auzoetako kide ezberdinek hitz egin dute, elkarri aitortza eta omenaldi modukoa eginez. Jaiari eusteko deiadarra izan da. Herria herri egiten baitute, beste eragilerekin batera, Jai Batzordeetan murgilduta dauden andoaindarrek. Nekez irudikatu daiteke Andoaingo gizarte bizitza, auzoetako jairik gabe.
