Familia giroan, kalean, elkartean, lagunartean... bizitasun eta kemen handiko emakume gisa ezagutu genuen, beti. Makina bat arrazoi zituen bizitzen segitzeko, eta horiei bat berezi-berezia batu zitzaien martxoan mundura etorri zen Enara biloba txikiarekin; bizipoza gertatu zen, benetan, Maria Jesusentzat.
Andoaingo herriari eta gizarteari begira, hasiera-hasieratik sinetsi zuen Irunberri elkartearen premiaz. Ondo jabetuta zegoen bertako euskaltzale, abertzale eta soberanisten topagune izango zen leku batek Andoaingo herriari eta gizarteari ekar ziezaiekeen ongizateaz herrigintzan, kulturgintzan, naziogintzan, bizikidetzan... Eta horrexegatik, lehenbiziko bultzatzaileetakoa izan zen elkarteak ateak ireki zitzan 1998an.
Alde horretatik, aitortza zor diogu, irmoki bezainbat eskuzabaltasunez jarraitu zuelako sinesten elkartean, elkartearen egitasmoan eta elkartea osatzen dugun guztiongan.