Pozik agertu dira Hurria-Sahara elkarteko kideak, ikusita Andoaingo herriak aurreko urtetan bezainbesteko eskuzabaltasuna erakutsi duelako Saharako herriaren aldeko elikagaien bilketa kanpainan. Guztira, lau bat mila kilo bildu dituzte (arroza, lekaleak, pastak, hegaluzea oliotan, sardinak oliotan, azukrea eta konpresak). Miren Erkizia elkarteko kideak azaldu du bildutako elikagaiek gaurtik aurrera egingo duten ibilbidea, Saharako errefuxiatuen-kanpalekuetarako iritsi daitezen.
Hurria-Sahara elkarteak eskerrak eman nahi dizkie, kanpainan parte-hartze zuzena izan dutelako, Andoaingo Udalari eta herritarri, bilketa-gunea jartzeko aukera eman dieten saltokiei, eta baita, herriko bost ikastetxeei (Ondarreta Herri Eskola, Aita Larramendi ikastola, La Salle-Berrozpe ikastetxea, Leitzaran Institutua eta ESCIVI).
Bestalde, elkarteak gogoratu du martxoaren 24an ospatuko dela Sahararen aldeko urteroko bertso-saioa.