Askotariko artistek parte hartu duten egitasmoa da Badon opera. Hala nola, Ainara Gurrutxaga, Oihana Vesga, Xanti Agirrezabala, Marina Suarez eta Ines Osinaga igoko dira oholtza gainera. Egileen esanetan, nork bere burua “berpentsatzeko-berreraikitzeko” ariketa da Badon. Formatuari dagokionez, hainbat elementuk osatzen dute ikuskizuna, besteak beste: baliabide bisualek, zuzeneko musikak eta baita mugimenduak, literaturak eta bertsoek ere.
Sinopsia
Badon opera posdramatikoa euskal kultura eta haren kanonak berrikustera dator. Jolasaren bitartez, etorkizun utopiko espekulatibo bat proposatzen du. Eszena sorkuntza honek esperientzia estetiko eta zentzumen bidezkol bat dakarkio publikoari, denok partekatzen dugun iruditeriatik sortutako mundu posible bat.
Bestelako euskal kanona, plaza publikoa eta genealogia ahalbidetuko duen agertokia asmatu nahi izan dugu. Zergatik fikziozko ariketa hau? Bestelako kanona, plaza publikoa eta aitortza praktikan jartzea ahalbidetuko digun
mundua asmateko beharra sentitzen dugulako.
Errelato alternatibo eta gaurkotu bat sortzeko, diseinu espekulatiboarekin lan egin dugu, beste mundu eta etorkizunak sortzeko: aukera ezberdinak planteatuko ditugu distopia katastrofikoetatik utopia amestuetara joateko.