La Salle Berrozpe Ikastetxeak Fabrikazio Adimenduneko espezializazio-gradua emango du datorren ikasturtetik aurrera, Instalazioa eta Mantenimendua adarraren barruan. Horrenbestez, espezializazio-ikastaro hori emango duen Buruntzaldeko ikastetxe bakarra izango da. Espezializazioko gradu horrek 900 ordu iraungo du, eta goi-mailako gradu hauetako ikasketak amaitu dituzten ikasleak sartu ahal izango dira bertan: Fabrikazio Mekanikoa, Diseinua edo Elektronika, Automatizazioa eta Robotika, Mekatronika eta Sistema Elektrotekniko eta Automatizatuak.
Ikastetxeko arduradunen esanetan, “Fabrikazio Adimenduneko espezializazio-ikastaroaren bidez, ikastetxeak beste apustu bat egin nahi izan du prestakuntza eskualdeko industriaren beharretara hurbiltzeko. Izan ere, enpresa askok eskatzen dute profil hori, eta, horregatik, % 100eko enplegagarritasuna izango duela aurreikusten da”.
Gradu honetako tituludunek fabrikazio digitaleko sistemetan aditu gisa eta metrologiako teknikari gisa jardun ahal izango dute, hain zuzen ere industria-produkzioaren sektorean automatizazio-osagai handia duten eta eragiketa- zein gestio-sistema digital guztiak integratzeko joera argia duten enpresa publiko zein pribatuetan.
Ate-irekiera
Espezializazio-ikastaro honi buruzko informazio gehiago irakasleek eskainiko dute, datorren maiatzaren 14an. 17:00etan eta 18:00tan saio bana iragarri dute. Informazio gehiago: 943 59 05 57.
Matrikulazio-epea
Maiatzaren 24ra bitarteko epea egongo da 2024-2025 ikasturterako aurretiko izen-ematea egiteko.